Ana səhifə Gündəm |
Mübariz Mədətov "Azərbaycan Xəzər Dəniz Gəmiçiliyi" QSC-nin sədr müavini vəzifəsindən azad edilib.
"Axar.az" APA-ya istinadən məlumat verir ki, bu barədə
Azərbaycan prezidenti İlham Əliyev bu gün sərəncam
imzalayıb.
Mənbə bildirib ki, Azərbaycan prezidenti M. Mədətovu məmur adına yaraşmayan hərəkətlərə yol verdiyinə, məmur etikasına əməl etmədiyinə, övladı ictimai yerdə qaydaları kobudcasına pozduğuna, qanunlara hörmət etmədiyinə görə vəzifəsindən azad edib.
Qeyd edək ki, Mübariz Mədətov Xəzər Dəniz Neft Donanmasının
rəisi olub, Xəzər Dəniz Gəmiçiliyi və Azərbaycan Dövlət Neft
Şirkətinin Xəzər Dəniz Neft Donanmasının ləğv edilməsi və onların
əsasında "Azərbaycan Xəzər Dəniz Gəmiçiliyi" QSC-nin
yaradılmasından sonra QSC-nin sədr müavini təyin edilib.
Xatırladaq ki, martın 15-də saat 00:30 radələrində Suraxanı rayonu,
Zığ şossesində Abdullayev Vüqar Ağasəlim oğlunun idarə etdiyi
VAZ-2106 markalı 10-NB-466 dövlət qeydiyyat nişanlı avtomobillə
Mübariz Mədətovun oğlu Xalid Mədətovun idarə etdiyi "Mercedes-Benz
G-55" markalı 90-FE-007 dövlət qeydiyyat nişanlı avtomobilin
toqquşub.
Nəticədə "VAZ-2106"da olan sərnişinlər - 1959-cü il təvəllüdlü Briliant Abdullayeva və 2008-ci il təvəllüdlü Ağasəlim Abdullayev hadisə yerində ölüb, 1950-ci il təvəllüdlü, xalq artisti Ağasəlim Abdullayev və 1984-cü il təvəllüdlü Səadət Abdullayeva isə müxtəlif dərəcəli bədən xəsarətləri ilə 3 saylı Şəhər Klinik xəstəxanasına yerləşdiriliblər.
Fakta görə Suraxanı Rayon Polis İdarəsində Cinayət Məcəlləsinin 263.3-cü (Yol hərəkəti və nəqliyyat vasitələrinin istismarı qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddəsi ilə cinayət işi başlanıb, müvafiq ekspertizalar təyin edilib və digər zəruri istintaq hərəkətləri yerinə yetirilib.
Yol nəqliyyat hadisəsinin "Mercedes-Benz G-55" markalı
avtomobilin sürücüsü Xalid Mədətov tərəfindən törədilməsinə kifayət
qədər əsaslı şübhələr olduğundan o, şübhəli şəxs qismində tutularaq
istintaqa cəlb olunub.
Sürücü X. Mədətov narkoloji tibbi müayinədən keçirilərkən orta dərəcəli alkoqol sərxoşluğu vəziyyətində olması müəyyən edildiyindən cinayət işi Cinayət Məcəlləsinin 263-1.4-cü (Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma ehtiyatsızlıqdan iki və ya daha çox şəxsin ölümünə səbəb olduqda) maddəsinə tövsif edilib.
Tarix
2014.03.17 / 16:22
|
Müəllif
Axar.az
|