Bu gecə ölkə daxilində 3 yanğın hadisəsi baş verib. "Axar.az" Fövqəladə Hallar Nazirliyinin rəsmi saytına istinadən xəbər verir ki, bu gecə Şəki, Kürdəmir və Balakən rayonlarında yanğın olub.

Şəki şəhərində vətəndaşa məxsus ümumi sahəsi 30 kv.m olan taxta konstruksiyadan ibarət çayxananın içərisində 20 kv.m sahədə məişət əşyaları yanıb. Çayxana yanğından mühafizə olunub və yanğın saat 23:56-da yanğınsöndürənlər tərəfindən söndürülüb.

Kürdəmir rayonu, Carlı kəndində (rayon mərkəzindən 40 km aralı) vətəndaşa məxsus ümumi sahəsi 180 kv.m olan ikimərtəbəli 6 otaqdan ibarət evin 2-ci mərtəbəsində 1 otağın tavanı 28 kv.m sahədə yanıb. Evin qalan hissəsi yanğından mühafizə olunub. Yanğın saat 01:10-da yanğınsöndürənlər tərəfindən söndürülüb.

Balakən rayonunda da yanğın olub. Rayonun Qullar kəndində (rayon mərkəzindən 15 km aralı) vətəndaşa məxsus ümumi sahəsi 90 kv.m olan birmərtəbəli 3 otaqlı evin yanar konstruksiyaları ev əşyaları ilə birlikdə yanıb. Yaxınlıqdakı ev yanğından mühafizə olunub. Yanğın saat 01:50-də yanğınsöndürənlər tərəfindən söndürülüb. Yanğın hadisələri zamanı xəsarət alan olmayıb.