Təbrizin "Traxtur" futbol komandası ilə Tehranın "İstiqal"
komandası arasında növbəti görüşdə gərginlik yaşanıb. Təbrizin
Səhənd stadionunda baş tutan yarışda təxminən 10 nəfər soydaşımız
tutulub. Rejimin təhlükəsizlik qüvvələri Urmu gölünün qurtarılması
ilə bağlı şüarlar səsləndirən tamaşaçılara vəhşicəsinə hücum edib
və toqquşmalar baş verib. Şüar səsləndirdiyi üçün günahlandırılan
və yaxalanan soydaşlarımızın sonrakı taleyi ilə bağlı hələlik heç
bir məlumat verilmir.
Güney Azərbaycanın müxtəlif şəhərlərindən stadiona gələn 70 min
nəfərdən çox tamaşaçı ingiliscə yazılmış böyük "Save Urmu lake"
plakatını qaldırıb və "Urmu gölü can verir-İran onun qətlinə fərman
verir!", "Türklərin iftixarı – Traxtur, Traxtur!", "Yaşasın
Azərbaycan", "Traxturu el istər - şərəfli millət istər!", "Gəlin
gedək, ağlayaq, Urmu göllünü dolsuraq!" kimi milli şüarlar
səsləndiriblər. GünAz.TV-nin xəbərinə görə, stadiona gələn
tərəfdarlar məmurlar tərəfindən ciddi şəkildə yoxlanılıb və
uşaqların valideynləri tərəfindən stadiona gətirilməsinə icazə
verilməyib. Stadionda 150 nəfər "İstiqlal" tərəfdarı da olub və
onlara stadionun yuxarı hissəsində yer verilib. Onlar hər zamankı
kimi polis rejiminə arxalanaraq tərbiyəsizlik edib, "Traxtur"
tərəfdarlarının üzərinə müxtəlif əşyalar atıblar.
Qeyd edək ki, Təbriz və Tehran komandalarının oyunu 1-1-lik bərabər
hesabla sona çatıb. "Traktor" İran çempionatının 6-cı pilləsində
qərarlaşıb.