Bu gün Azərbaycanın ilk tələbə jurnalist təşkilatı "Gənc Reportyorlar Birliyi"nin 4 yaşı tamam olur.

Bu barədə təşkilat sədri Məmməd Ağayev saytımıza açıqlamasında məlumat verib.

O, 2009-cu ildən bu yana fəaliyyət göstərən təşkilatın hazırda öz ətrafında 1034 nəfər tələbə toplaya bildiyini qeyd edib. Bununla yanaşı sədr 12 nəfərlə yaradılan təşkilatın hazırda demək olar ki, ölkənin bütün Jurnalistika fakültələrində öz nümayəndəliyinin yaradıldığını da bildirib.

"Məğlubedilməz və usanmaz bir komanda formalaşdıra bildik. Bu gün ölkə mediasında çalışan gənc-istedadlı jurnalistlərin müəyyən bir qismi məhz "Gənc Reportyorlar" Birliyinin üzvləridir. Bu təşkilat ətrafında yalnız vicdanlı, ləyaqətli, vətənpərvər, çalışqan, istedadlı gəncləri toplayıb".

Qeyd edək ki, "Gənc Reportyorlar" Birliyi bu günə qədər 68 tədbir, 33 görüş keçirib, 2 beynəlxalq konfransda iştirak edib, 1 beynəlxalq konfransın təşkilatçılarından olub.